Gwasanaeth am ddim a chyfrinachol yng Nghymru i unrhyw un sydd wedi’i effeithio gan hunanladdiad

Mae’r Gwasanaeth Cynghori a Chyswllt Cenedlaethol (NALS) yn wasanaeth cyfrinachol am ddim i unrhyw un sydd wedi cael ei effeithio gan hunanladdiad. Mae’n darparu gwasanaeth cymorth cyfrinachol am ddim ac mae ar gael i unigolion a theuluoedd o bob oed sy’n byw yng Nghymru. Gellir ei ddarparu dros y ffôn, wyneb yn wyneb neu drwy alwad fideo.

Gall ein tîm sydd wedi’i hyfforddi’n arbennig gynnig lle diogel ac empathig i siarad a chael eich clywed. Byddant yn eich helpu i ymdrin â’r emosiynau niferus a chymhleth a deimlir ar ôl hunanladdiad. Gall y sioc gychwynnol fod yn ddinistriol ac yn llethol, ond cofiwch nad ydych chi ar eich pen eich hun.

Gall ein tîm eich cefnogi yn y dyddiau neu’r wythnosau yn syth ar ôl hunanladdiad, neu yn y misoedd, neu hyd yn oed flynyddoedd, ar ôl eich colled. Gallwn gynnig cymorth gyda phethau ymarferol hefyd fel y cwest, problemau ariannol, yr heddlu neu gefnogi eraill rydych chi’n gwybod eu bod wedi cael eu heffeithio. Gallwn eich helpu i drefnu angladd hyd yn oed.

Mae gan hunanladdiad effaith bell ac agos, gan effeithio ar fwy na theulu agos yn unig. Gallwch fanteisio ar ein gwasanaeth hefyd os ydych chi’n ffrind, cydweithiwr, cymydog neu dyst.